CEBU CITY- Gi-kwestiyon ug nangayo og katin-awan si Cebu City Vice-Mayor Tomas “Tommy” Osmeña sa nakalabayng administrasyon sa Kagamhanang Dakbayan sa Sugbo sa rason kung nganong nagpalit og daghang mga television sets nga gigamit niadtong nakalabayng Palarong Pambansa 2024 nga gibaha sa basement facility sa Department of Education – Cebu City Division Office sa Imus Avenue, Barangay Day-as ning dakbayan.
Kini ang gibuhian nga pamahayag ni Osmeña atol sa pagbisita niya sa DepEd Cebu City Office kagahapong adlawa sa Biyernes, Hulyo 25 kauban sila City Councilor Harold Go ug Former City Councilor Joy Augustus Young.
Dinhi ilang gisusi ang mga nabahaan nga mga TV units nga miabot sa 16 ang ihap nunot sa kusog nga pag-uwan ug baha sa dakbayan niadtong nakalabayng semana.
Gipunting partikular ni Osmeña si kanhi City Councilor ug Vice-Mayor nga si Donaldo “Dondon” Hontiveros sa paghatag og katin-awan sa procurement sa 55-inch TVs nga daw usik-usik ug minos kaayu ang paggamit.
Ang bise-mayor mao karon ang nagsilbing chairman sa Committee on Education sa konseho sa dakbayan samtang si Hontiveros kay maoy kanhi chairman sa Committee on Sports nga nagdumala sa Palaro 2024 nga gipahigayon sa dakbayan.
