Gisuspenso sa Cebu Port Authority ang tanang biyahe sa mga barko sa mga Pantalan sa Sugbo subay sa Bagyong Tino nga gilaumang moigo ugmang adlawa.
Kini bisan paman sa gilauman nga modagsa ang mga pasahero hilabi na nga bag-o lang nahuman ang pag-obserbar sa Kalag-kalag 2025.
Atol sa pakighinabi sa Bombo Newsteam kang Maryknoll Bolasa, Public Relation Officer sa Cebu Port Authority, nga gikanselar ang tanang biyahe sa shipping lines gumikan sa dili luwas ang paglawig sa kadagatan.
Ingon man nga gipahimangnoan nalang ang mga biyahero nga magpabilin usa sa ilang mga panimalay ug mangandam sa moabot nga Bagyo.
Sa pikas bahin, basi sa ulahing datos, nakatala ang Coast Guard District Central Visayas og 477 ka na-stranded nga mga pasahero, 21 ka barko, ug 78 ka rolling cargoes tungod sa kasamtangang kondisyon sa panahon.
Samtang, 129 ka barko ug 12 ka motorbanca ang kasamtangang nagpasilong sa mga pantalan sa Central Visayas.
Sa pakighinabi sa Bombo Newsteam kang LTJG Abel Jan Lomboy, ang tigpamaba sa Coast Guard District Central Visayas nga naka-heightened alert status ang pwersa sa CGD 7, ingon man nga aktibo usab ang ilang pakig-alayon sa District Command Center nga nakabantay usab 24/7.
Samtang, gisaka na sa PAGASA ang Signal No. 2 sa Northern ug Central Cebu, apil ang Mandaue City, Cebu City, Lapu-Lapu, Carcar, Toledo, Danao, Bogo, Naga, Talisay, ug Bantayan ug Camotes Islands.
