CEBU CITY- Nakatala ang Cebu Ports Authority og kapin sa 230,000 ka mga pasahero sa mga pantalan sa tibuok Sugbo karong unang bahin sa Semana Santa 2025.
Kun diin sulod sa unang upat ka adlaw sa Semana Santa karong tuiga kay miabot na sa 231,751 ka mga pasahero ang miabot sa mga pantalan sa tibuok lalawigan sa Sugbo.
Ang insaktong ihap kay miabot sa 107,049 sa inbound passengers samtang 124,702 sa mga outbound passengers ubos sa monitoring sa CPA sa Oplan Byaheng Ayos: Holy Week and Summer Vacation 2025.
Kung diin, ang pinakataas nga passenger volume kay niadtong Miyerkules, Abril 16 nga anaay 94,740 ka mga byahedor diin 42,249 ang inbound passengers ug 52,491 ang outbound passengers.
Sa mga naunang adlaw nakatala og 58,325 ka mga pasahero niadtong Abril 15, anaa usab sa 42,704 niadtong Abril 14, ug 35,982 niadtong Abril 13.
Gani nangandam na usab ang CPA sa pagdagsa sa mga pasahero karong hinapos sa Semana Santa tungod na sa pagbalik sa mga byahedor sa ilang mga trabaho, eskwela, ug negosyo sa Sugbo karong umaabot Lunes, Abril 21 liwas sa Easter Sunday.
Una nang nipahibalo ang CPA nga gibutang niini ang tanan na pantalan sa lalawigan sa heightened alert ug nag-implementar og 24/7 security monitoring pinaagi sa Operations Center niini.
Dili muminos sa 400 ka mga Port Police ug Security Personnel ang gipakatap dugang sa 23 ka mga K9 patrolling units ug 2 ka patrol boats sa pagsiguro sa kahapsay ug kalinaw sa mga pantalan.
Inabagan sa ubang ahensya ang paghatag og seguridad sa mga pantalan sama sa PH National Police (PNP), PH Drug Enforcement Agency (PDEA), Maritime Industry Authority (MARINA), PH Coast Guard (PCG), ug sa Land Transportation Office (PCG).
