Gikataho sa Department of Health Central Visayas nga walay influenza outbreak ang rehiyon apan adunay gimonitor nga influenza-like symptoms sa tent city sa amihanang Sugbo.
Hinungdan nga dili gihapon magkompiyansa bisan paman nga una nang gipaambit ni DOH Secretary Dr. Teodoro Herbosa nga walay outbreak sa naasoy nga sakit sa nasud, ingon man nga normal lang ang pagsaka niini gumikan flu season ning buwan sa bermonths.
Mipasalig usab ang buhatan nga ang mga kaso sa rehiyon kay gikonsiderar lang nga mga ‘mild cases’ bsua dili kini angayan nga kabalak-an hilabi na nga padayon ang pagpabakuna matag tuig hinungdan nga dili gayud angay nga maalarma.
Apan, adunay mga gimonitor karon nga influenza-like symptoms sa tent city nga gitukod sa amihanang Sugbo, kini ang gipaambit ni Dr. Rannie Corazon Gravador gumikan sa sitwasyon nga haduol ug sikit-sikit ang kahimtang sa mga residente nga naapektuhan sa linog.
Gipunting usab niini nga ang dali nga pagkatakod sa sakit ngadto sa mga bata nga huyang og immune system, ingon man sa mga senior citizens.
