Bad news para sa mga trabahante sa Cebu City Hall tungod kay posibleng walay matagana nga Charter Day bonus karong tuiga tungod sa budget deficit ug kakuwang sa pundo sa kagamhanang dakbayan sumala pa sa pamahayag ni City Mayor Nestor Archival Sr.
Kini ang gibutyag ni Mayor Archival atol sa pakighinabii niini sa mga sakop sa tigbalita niadtong Lunes, Pebrero 16 diin gipasabot sa mayor nga ang pagpagawas sa monetary incentives kay posibleng ma-flag sa Commission on Audit (COA) tungod sa kakuwang sa pundo sa kagamhanang dakbayan.
Sumala pa sa mga nakalabayng audit report sa Cebu City Hall nga miabot sa P91-milyones ang deficit gikan niadtong Enero hangtod Disyembre 2025 nga naghatag og kabalaka sa panalapi sa syudad lakip na ang mga bonus sa mga empleyado.
Gidugang ni Mayor Archival nga ang COA kay kanhi na ni-flag sa City Hall ug sa pagsuspenso sa paghatag og Charter Day bonus tungod sa napinis sa pundo ug kakuwang sa mga rekisitos.
Gipanglantawan niini ang Notice of Disallowance sa mga bonus nga nahatag niadtong 2023 ug 2024 diin nagpasabot nga posibleng iuli kini kung makit-ang dili sakto ang pagtagana niini.
Sa pagkakaron, ang gikonsiderar sa opisyal kay mao ang 10-ka adlaw nga leave credits isip alternatibong insentibo sa mga empleyado sa City Hall.
Saulogon ang ika-89 nga Charter Day sa dakbayan sa Sugbo inig Pebrero 24 sukad nga nagtukod kini isip syudad niadtong 1937. Isip paghadum sa espesyal nga adlaw sa syudad kay gilaumang adunay mga pipila ka mga kalihukan ang ipahigayon sa maong adlaw.
