Nagpasidaan ang China sa Pilipinas batok sa bisan unsang lakang nga posibleng makadaot sa relasyon sa duha ka nasod, nunot sa mga plano sa Taiwan nga magbukas og representative Office sa cebu.
Ang tigpamaba sa Chinese Foreign Ministry nga si Guo Jiakun nagpahayag nga ang Pilipinas angay nga motuman sa “One China” policy ug likayan ang mga aksyon nga makadaot sa relasyon tali sa Manila ug Beijing.
Gikumpirma ni Taiwanese Foreign Minister Lin Chia-lung nga nag-andam ang Taipei sa pagbukas og ikaduhang representative office sa Pilipinas, dugang sa kasamtangang Taipei Economic and Cultural Office sa Metro Manila.
Matod ni Lin, ang opisina sa Cebu nagtumong sa paghatag og serbisyo sa mga biyahero ug negosyante gikan sa Taiwan nga anaa sa mga rehiyon sa Visayas ug Mindanao, ingon man sa pagpalapad sa relasyon sa ekonomiya uban sa Pilipinas.
Wala pa matino ang petsa sa pagbukas niini.
Samtang, gipamatud-an pag-usab ni President Ferdinand Marcos Jr. niadtong Agosto nga nagpabiling pasalig ang Pilipinas sa “One China” policy, bisan pa man nga nagpadayon ang relasyon sa pamatigayon uban sa Taiwan.
