CENTRAL VISAYAS-Naluwas gikan sa kidnap-for-ransom group ang usa ka Chinese nga negosyante sa lungsod sa Panglao, Bohol adlaw nga Martes, Oktubre 24, 2023.
Gitino ni Police Lieutenant Colonel Gerard Ace Pelare, tigpamaba sa Police Regional Office sa Central Visayas (PRO 7), nga gikidnap ang biktima gahapon Lunes, Oktubre 23, 2023.
Nasikop usab sa Provincial Intelligence Unit sa Bohol Police Provincial Office ang mga suspek sa pagdagit nga gilangkuban sa upat ka Chinese national ug duha ka Filipino.
Matod ni Pelare, ang kapolisan sa Bohol mipahigayon dayon sa operasyon human makadawat og report kalabot sa insidente sa pagdagit.
Dugang pa, nga napangita dayun sa kapolisan ang mga suspetsado gumikan kay nagpadala ang pamilya sa biktima og ransom money ngadto kanila.
Ang grupo gikatahong sakop sa usa ka dakong sindikato nga target sa mga Chinese traders.
Giingong gikan sa Manila ang mga suspek ug nibiyahe lang sa Bohol aron lang sa pagkidnap sa biktima.
Kasamtangang nagpadayon ang imbestigasyon sa kapulisan kabahin sa maong insidente.
