Nasakmit sa CIDG National Capital Region Regional Field Unit- Special Operations Team uban sa Department of Social Welfare and Development (DSWD) ang 6,000 ka kahon sa relief goods nga adunay logo sa DSWD ug may marka nga “Not for Sale” nga nagkantidad ug kapin sa P15 milyones sa usa ka bodega sa Juan Luna St., Brgy. 56, Tondo, Manila.
Miresulta kini sa pagkasikop sa suspek nga giilang si “Janice” tungod sa illegal nga pagpamaligya og relief goods ug illegal nga paggamit og insignia, tungod sa dili awtorisadong paggamit sa opisyal nga logo sa DSWD.
Giklaro sa DSWD nga walay koneksyon sa ahensya ang mga butang nga nadiskubre lakip na ang bodega. Gitug-an usab niini nga walay personnel sa DSWD ang nalambigit sa maong insidente.
Kusganong gikondena sa DSWD ang dili awtorisado nga paggamit sa ilang opisyal nga logo ug ang bisan unsang pagsulay sa pagpahisalaag sa publiko, nga dili lamang makalingla sa mga indibidwal apan makadaut usab sa integridad ug kredibilidad sa ahensya.
Namahayag usab ang buatan sa ilang hingpit nga suporta alang sa nagpadayon nga imbestigasyon ug andam nga mohimo sa tanan nga kinahanglan nga ligal nga aksyon batok sa mga nakit-an nga responsable.
Matod ni CIDG Acting Director PMGen. Robert Morico II, ang operasyon naggumikan sa report kalabot sa giingong pagbaligya sa mga relief goods sa DSWD Family Kit nga adunay marka nga “Not for Sale”.
Ang pagkadiskobre sa mga relief goods nahitabo taliwala sa nagpadayon nga relief mission sa DSWD ug ubang ahensya sa gobyerno nunot sa kusog nga linog nga miigo sa Sugbo ug taliwa sa pagkusokuso sa Bagyong Paolo sa nasod.
