CEBU CITY-Nitukod og bag-ong grupo sa City Hall si Cebu City Mayor Michael Rama nga gitahasan sa pag-supervise ug pag-regulate sa habal-habal (motorcycle-for-hire) operations.
Kung diin si Rama niluwat og Executive Order (EO) No. 8, nga giulohan og An Order Creating the Cebu City Habal-Habal Drivers’ Coordinating Office, o ang CCHCO.
Sulod sa EO ang paghimo og database sa tanang habal-habal drivers sa dakbayan, paghimo og koneksyon sa nagkalain-laing asosasyon sa mga habal-habal drivers, ug pagpahigayon ug pagsuporta sa barangay o grassroots habal-habal associations.
Ang CCHCO gitahasan usab sa pagpahigayon ug awareness seminars ug information campaign kalabot sa road safety, ug katungod ug obligasyon sa mga habal-habal drivers.
Tungod kay nag-una nilang tahas mao ang pag-regulate sa mga operasyon sa habal-habal, ang CCHCO gipaabot nga makig-alayon sa Cebu City Traffic Office (CCTO) sa mga butang sa pagtudlo og mga rota ug terminal sa mga habal-habal driver.
Ang komite sa regulasyon gilangkoban sa labing menos tulo ka mga ehekutibo, kung diin ang Executive Director mao ang overall head.
