TALISAY CITY, CEBU- Nipahinumdom si Jonathan Tumulak, pangu sa City of Talisay-Traffic Operations Development Authority (CT-TODA) sa mga ginikanan nga bantayan kanunay ang ilang mga menor de edad nga mga anak aron dili sila maka drive sa mga sakyanan.
Kini human nga niadtong Miyerkules, Hulyo 12, usa ka 12-anyos nga bata ang nalambigit sa traffic incident dihang nabanggaan sa iyang gimanehong pickup ang laing sakyanan sa dakbayan sa Talisay.
Nasayran, nga paingon unta ang bata mopalit og tubig.
Ang amahan sa bata niingon nga iya kining giingnan nga mopalit og tubig apan wa gyud magdahom nga ang bata maoy magmaneho.
Walay naangol sa maong disgrasya ug gamay ra nga danyos ang naangkon sa sakyanan sa biktima.
Matod ni Tumulak nga kagahapon, ang amahan sa bata nisaad nga bayran ang danyos ug maayo na nga nahusay ang kaso.
Sayo gahapong adlawa, ang bata ug ang iyang mga ginikanan, uban ang mga personahe sa City Social Welfare and Development Office (CSWD), nagpahigayon og meeting sa buhatan sa CT-TODA.
