Napuno sa pagsaway online ang pamunuan sa Cebu Normal University (CNU) human kini sa ilang ora-oradang pagpatuman og 100% online classes niadtong nakalabayng adlaw sa Lunes, Hulyo 21, 2025.
Ang maong kamanduan kay mao ang Memorandum Circular No. 43, series of 2025 ng gikan sa Office of the University President diin nagmando sa mga Deans of Colleges, Supervisors, faculty members, ug mismong sa mga estudyante sa pagbalhin ngadto sa online modalities sa tanang kalihukan sa eskwelahan.
Nahimong epektibo dayon ang maong mando niadtong Martes, Hulyo 22 diin nakahatag og dili lang kabalaka apan hasta pagsaway ilabi na gikan sa mga tinun-an tungod sa kalit-kalit sa anunsyo sa tunghaan nga zero-to-none ang konsultasyon ang gihimo.
Gani sumala pa sa grupong nga Kabataan Partylist – CNU nga gihulagway nila ang aksyon isip “poor planning” diin ang pamunuan sa unibersidad kay wala mihatag og pagpakabana sa mga tinun-an sa dekalidad nga edukasyon.
Nakahatag pa kini og labad sa ulo kanila tungod kay dili sento-porsyento sa mga estudyante sa CNU ang adunay stable nga access sa kusog nga internet nga maoy primerong rekisitos nga makasalmot og online class.
Mipadayag sa nagkadaiyang social media platforms ang mga reklamo sa tinun-an og mga magtutudlo diin duna pay nataho nga usa ka pundok sa faculty ang gipapahawa sa ilang opisina tungod sa rason nga i-retrofit kini aron mahimong compliant sa proyektong Centralized Student Smart Hub ang unibersidad.
Misuway og pagkab-ot ang Bombo Radyo Cebu Newsteam sa pamunuan sa CNU ug bisan sa habig sa Supreme Student Council niini sa ilang bahin sa maong panghitabo apan sa pagkakaron wala pa sila mihatag sa ilang pamahayag.
