Nagpahigayon na ang Philippine Army (PA) og lawom nga imbestigasyon sa post ni Army Col. Audie Mongao bahin sa iyang pag-atras sa suporta sa administrasyong Marcos.
Kini human sa pagsumiter sa Army colonel sa iyang kaugalingon ngadto sa Phil. Army, pipila ka oras human sa iyang kontrobersyal nga post sa social media.
Sumala ni PA Training Command Commander Maj. Gen. Michael Logico, ang sayop ni Mongao dili sayon ug gusto sa kasundalohan nga mahibal-an ang tanan nga mga hinungdan nga nakaapekto sa iyang desisyon nga buhaton kini.
Atol sa panagsulti tali ni Logico ug Mongao, ang ulahi giingong miangkon nga siya mismo ang naghimo sa kontrobersyal nga post.
Nahibal-an usab sa 2-Star general nga ang colonel wala’y igong tulog sa miaging tulo ka adlaw, mao nga gitambagan siya nga mopahulay samtang nagpadayon ang imbestigasyon.
Ingon man nga gipailalom usab si Mongao sa mandatory medical checkup ug evaluation human mibalik sa PA.
Gipaniguro ni Col. Logico nga ang gibuhat ni Mongao usa ka seryoso nga pagtipas gikan sa disiplina sa militar nga gisunod pag-ayo ug estrikto sa mga sundalo, busa kinahanglan kini nga seryosohon.
Ang bugtong ‘nagpagaan’ o gamay nga nagpamenos sa iyang sala, sumala sa heneral, mao ang iyang boluntaryong pagpasakop sa iyang kaugalingon ubos sa kontrol sa militar ug kooperasyon sa PA.
Sa pagkakaron, wala pa’y mga silot nga natino batok sa koronel sa Army tungod kay ang Armed Forces of the Philippines nagpadayon pa sa pagkompleto sa imbestigasyon sa mga aksyon sa opisyal.
