CENTRAL VISAYAS- Mainiton nga gihangop sa Commission on Elections Region 7, ang mga European Union observers nga niabot sa Sugbo aron pagmonitor sa kinatibuk-ang transparency sa 2025 local midterm polls.
Sa pakighinabi sa Bombo Newsteam kang Atty. Francisco Pobe, ang Regional Director sa COMELEC-7, iyahang gikompirmar nga sila nangabot niadtong Lunes, Abril 21, 2025, nga usa ka grupo sa mga langyaw nga long-term observers ang anaa karon sa probinsiya.
Sumala pa ni Atty. Pobe, ang mga katuyoan niining mga international observers mao ang pag obserbar sa mga kalihokan o “flow” sa umaabot nga eleksyon, Mayo 12, 2025.
Ang mga insight ug assessment sa mga tigpaniid maghatag sa Comelec og listahan sa mga best practices nga naobserbahan atol sa eleksyon samtang maghatag og rekomendasyon alang sa kalamboan sa pagpahigayon sa umaabot nga eleksyon.
Ang mga international observers, molungtad hangtud sa adlawng piniliay, ug mo sumiti sa ilahang mga na obserbaran direktamente sa COMELEC-Manila.
Kini nga mga tigpaniid idestino sa urban ug rural nga mga dapit aron sa pagrekord sa mahinungdanong mga panghitabo sa panahon sa botohan, lakip na ang pre-election o mga kalihokan sa kampanya.
Matod niini, nga importante ang mga langyaw nga tigpaniid tungod kay naghatag sila og mga panabut, independente nga panglantaw, ug perspektibo sa gawas nga bahin sa pagpahigayon sa mga botohan.
Dugang pa, nga ang mga tigpaniid, gikan sa France ug Czech Republic, nagsugod na sa pagpangutana sa mga butang sama sa proseso sa lokal nga eleksyon ug sa ilahang mga responsibilidad ug katungdanan isip usa ka election officer.
Sa pikas bahin, giklaro usab ni Atty. Pobe, nga walay angay ikabalaka ang mga tao nga maka samok kini kay ilahang gisiguro nga mga hanas ug adunay insaktong experience ang mga European Union Election Observers.
Sa pagkakaron, wala pay kompirmadong dapit og asa sila mag obserber, apan andam ra ang ahensya sa paghatag og igong siguridad niini.
