Mogahin ang United Kingdom og hangtod sa £660 milyon, o mga $892 milyon, sa France sulod sa tulo ka tuig isip kabahin sa usa ka bag-ong kasabutan aron mapugngan ang pagsaka sa illegal migration tabok sa English Channel.
Ang mga opisyal nag-ingon nga ang pondo gamiton aron mapalig-on ang seguridad sa baybayon sa amihanang France, diin liboan ka mga migrante ang ilegal nga mibiyahe paingon sa UK.
Ang mga numero nagpakita nga mga 41,000 ka mga tawo ang gilauman nga motabok sa Channel sa 2025, hapit motakdo sa rekord nga gitakda sa 2022, diin ang kasabutan maglakip usab sa £500 milyon aron mapalig-on ang mga operasyon sa pagpatuman, lakip ang pagpadala sa mga 1,100 ka pulis, mga operatiba sa paniktik ug mga personahe sa militar sa mga lugar sa baybayon.
Dugang pa, ang £160 milyon ipagawas lamang kung ang mga bag-ong lakang mapamatud-an nga epektibo sa pagpakunhod sa mga pagtabok. Kung kini mapakyas, ang pondo mahimong mahunong pagkahuman sa usa ka tuig.
Samtang ang bag-ong kasabutan mopuli sa miaging tulo ka tuig nga kasabutan sa 2023 nga nagkantidad og mga £480 milyon, ug ang bag-ong plano naglakip sa paghimo og 50-ka-tawo nga riot police unit, gipalapdan nga intelligence ug judicial teams, ug dugang nga maritime patrols.
Ang duha ka nasud mogamit usab og mga drone, duha ka helicopter, ug gi-upgrade nga mga camera system aron mas mabantayan ang kadagatan.
Ang France magdugang usab og bag-ong patrol vessel ug kapin sa 20 ka maritime officers aron pahunungon ang mga sakayan nga gigamit sa pagtabok.
Sumala sa gobyerno sa UK, ang hiniusa nga operasyon sa duha ka nasud nakapahunong na og kapin sa 42,000 ka ilegal nga pagtabok sukad ang gobyerno sa Labour nga gipangulohan ni Prime Minister Keir Starmer milingkod sa gahum niadtong Hulyo 2024.
