CEBU PROVINCE-Di mominos upat ka corn-drying facility ang ibutang sa Cebu Provincial Government sa lungsod sa Medellin, amihanang Sugbo aron maseguro nga igong suplay sa hybrid yellow corn o corn grits sa probinsiya.
Nagtumong ang inisyatiba sa pagdasig sa mga gagmayng mag-uuma sa tubo sa munisipyo sa pagbalhin ngadto sa pagpananom og mais.
Kini ang gituki atol sa panagtagbo nila ni Gobernador Gwendolyn Garcia ug ni Hubert Go, bise presidente sa marketing sa H and E Enterprises Inc., nga nagsuplay og post-harvest machinery ug equipment.
Matag pasilidad sa post-harvest makahimo sa pagpauga sa 15 metriko toneladang lugas sa mais matag 10 ka oras.
Gibutyag ni Dr. Roldan Saragena, provincial agriculturist, nga ang mga corn dryer ibutang sa Barangay Caputatan Sur, nga ma-access sa duol nga local government units sama sa San Remigio, Daanbantayan, Tabuelan, Tabogon ug Bogo City.
Gitambagan sa gobernador ang mga mag-uuma nga likayan ang dungan nga pagpananom og mais o i-schedule ang ilang kalihokan sa pagpananom aron dili sila magdungan sa pag-ani sa mga tanom.
Sa inisyal nga survey nagpakita nga adunay 695 ka ektarya nga yuta sa amihanang Sugbo nga mahimong tamnanan og mais kung asa ang mga mag-uuma makaani og walo ka metrikong tonelada nga mais matag ektarya.
Kahinumduman, si Garcia maoy nangulo sa ceremonial planting sa hybrid yellow corn sa 50 ka ektarya nga luna sa Caputatan Sur, diin ang mga mag-uuma nagsugod sa pagbiya sa pag-uma sa tubo.
