Misaad ang hepe sa Philippine National Police (PNP) nga si PGen. Nicolas Torre III nga mopatuman og 8 ka oras nga shift matag adlaw alang sa mga polis.
Matod niya nga ang mga pulis tawo ra usab ug nagkinahanglan og pahuway ug dili molihok nga daw hinimo sa makina.
Sa pagkakaron, adunay mga pulis nga nagserbisyo og kapin sa 72 ka oras matag semana, diin si Torre mismo nihatag og gibug-aton nga ang sobra nga oras sa pagtrabaho sa pipila ka mga pulis supak sa labor code diin nag-ingon nga ang gitugot nga oras sa pagtrabaho sa tibuok semana kinahanglan nga 40 ka oras.
Tumong usab niini nga mas ma-focus ang mga pulis sa mga komunidad sa ilang trabaho ug bisan sa ilang performance aron dili sila matulog sa ilang oras sa pagtrabaho.
Nunot niini, misaad usab ang hepe nga kung adunay mga pulis nga makit-an pa nga nangatulog samtang nag-duty, i-report dayon kini sa ilang buhatan aron matangtang dayon sa ilang serbisyo.
Samtang, bugti sa pagpatuman sa 8-hour working shift, gusto sa hepe nga makita ang dekalidad nga serbisyo gikan sa kapulisan ug dugang police visibility gikan sa ilang han-ay.
