CEBU – Dakong supak ang Bayan Muna Central Visayas sa pagpasaka sa buhisan sa katawhang Pilipino.
Gibutyag ni Jaime Paglinawan, ang chairman sa Bayan Muna Central Visayas, nga dugang kini nga pag-antos, hayan dili angayan nga ang katawhan man ang paninglon sa P13 trillion nga utang sa gobyerno.
Matud pa, angayan nga buhisan ug dako sa gobyerno ang mga tax evaders nga anaa sa listahan sa Bureau of Internal Revenue (BIR), ingon man ang mga dagkong korporasyon ug ang mga adunahan.
Gidugang pa ni Paglinawan, angayan nga kuha-on sa gobyerno ang P203 billion nga buhis nga wala bayari ni president-elect Bongbong Marcos, ingon man ang ill-gotten wealth sa mga Marcos, nga giingong dakong tabang alang sa panudlanan sa Pilipinas.
Sigon pa, naglisod na ang katawhan ug dili na angayan nga pabug-atan pa ug maayo pinaagi sa pagpasaka sa buhis.
Gituohan niini nga napuno sa korapsyon ang nasud, ug makita kini pinaagi sa mga imbestigasyon sa Senado, butang nga angayan usab gukoron sa gobyerno.
