Aduna nay 11 kabuok ang na rescue sa mga natabunan nga mga empleyado human nidahili ang usa ka landfill, nga anaa mahimutang sa bukirang barangay sa Dakbayan sa Sugbo, sa Binaliw 1.
Kagabii lang, ang katapusang naugkat sa mga search and rescue operation pesonnel mao ang usa ka lalaki ug dali kining gidala usab sa tambalanan, ug adunay kompirmadong patay usab sa maong panghitabo, usa ka babae nga 22 anyos.
Mao kini ang gikabutyag ni Cebu City Councilor Joel Garganera atol sa ekslusibong pagkab-ot sa Bombo Radyo Cebu newsteam kaniya, diin iyahang gikabutyag nga sa latest update kaganinang buntag lang, niabot na sa 38 ka mga indibidwal ang gitioohang nagpabiling na trapped sa nagtumpag tungod sa kahabog sa mga basura sa maong landfill.
CUE IN: CEBU CITY COUNCILOR JOEL GARGANERA (VC_GARGANERA 1)
Gidugang ni Garganera nga mokabat usab og 300 ka mga composite team sa maong luna nga padayong nagpahigayon sa search, rescue and retrieval operations, nga naglangkob sa mga sakop sa Cebu City Disaster Risk Reduction and Management Council (CCDRRMC), Bureau of Fire Protection (BFP), Battalion gikan sa Philippine Army, ug sa Philippine Coast Guard (PCG).
Samtang, gitataw usab sa maong konsehal nga adunay liboan ka metric ton sa mga basura ang ma-cater sa maong landfill kada adlaw, diin sa Dakbayan sa Sugbo, nakagahin og 600 metric ton sa mga basura.
Adunay gibana-bana usab nga 4 ka Local Government Unit (LGU) nga nipansak sa ilang basura sama sa Mandaue, Lapu-Lapu, ug Consolacion.
Sa maong panghitabo, gikabutyag sa Konsehal nga posibleng ipaubos na ang Dakbayan sa Subgo sa State of Emergency tungod sa mga pagkabalda nga matala human nga sa kasamtangan, dili pa una o pahatdan og mga basura ang maong pasilidad.
Hinungdan nga sa karon, human nga makahatag na sa mga report ang CCDRRMC, mopahigayon sila og emergency meeting aron pagahisgutan ang mga lakang nga angay buhaton sa dakong problema nga gisagubang karon sa Sugbo.
Dugang pa nga ang LGU gikan sa South ug North, nakig alayon na usab aron sabutan kung asa posible nga temporaryong ilabay ang mga basura.
