Gipukan sa defending champions Argentina ang 10-man Switzerland, 3-1, pinaagi sa usa ka kulbahinam nga extra time, aron selyohan ang ilang dapit sa semi-finals sa FIFA World Cup 2026, Dominggo, Hulyo 12, 2026.
Gidominar sa Argentina ang tibuok Arrowhead Stadium ug sayo nga nagsaulog sa ika-10 nga minuto sa dula human gipasa sa ilang star nga si Lionel Messi ang bola ngadto kang Alexis Mac Allister, kinsa mipasulod sa una nga goal pinaagi sa usa ka header.
Bisan pa man niini, nakatabla ang Switzerland sa tunga-tunga sa ikaduhang bahin sa dula sa ika-67 nga minuto pinaagi sa goal ni Dan Ndoye human sa maalamong pasa gikan kang Ricardo Rodriguez.
Apan paglabay sa lima ka minuto, naigo sa dimalas ang Switzerland human matangtang sa dula si Breel Embolo, kinsa gipagawas sa field (red card) human makakuha og ikaduhang yellow card tungod sa paghimo-himo og reaksyon o pagpakaaron-ingnon nga na-foul (simulation).
Tungod kay tabla ang score nga 1-1, ang dula niabot sa extra time.
Isog nga gipugngan sa Switzerland ang sunod-sunod nga atake sa Argentina hangtod nga sa ika-112 nga minuto, milusot ang usa ka katingalahang sipa ni Julian Alvarez ngadto sa ibabaw nga eskina sa goal net.
Gidugangan pa kini og mabulukong third goal ni Lautaro Martinez sa himatyon nga bahin sa dula aron selyohan ang kadaugan.
Tungod sa maong kadaugan, makigtigi ang Argentina sa England sa semifinals sa 2026 FIFA World Cup.
Nagpadayon usab ang walay kapildihan nga kampanya sa Argentina sa torneyo samtang gipaningkamotan niini nga mahimong unang defending champion sukad sa Brazil niadtong 1962 nga makadepensa sa korona sa FIFA World Cup.
