Nagpadayon ang banggiitang kampanya sa France human nila gipukan ang Morocco, 2–0, sa quarterfinals sa nagpadayong FIFA World Cup 2026.
Tungod sa maong kadaugan, nakuha sa powerhouse team ang unang pwesto sa semifinals sa maong torneyo human sa ilang panagtigi nga natapos kaganihang alas-6:00 sa buntag, oras sa Pilipinas.
Gipangulohan sa team captain nga si Kylian Mbappé ang opensiba sa France human kini miposa og goal sa ika-60 nga minuto sa dula.
Gisundan pa gyod kini ni Ousmane Dembélé pinaagi sa laing goal sa ika-66 nga minuto aron mas selyohan ang ilang labaw.
Tungod niini, nagtabla na sila si Mbappé ug ang Captain sa Argentina nga si Lionel Messi nga pulos adunay tag-walo ka goals sa maong kompetisyon, ug sila karon ang nag-una sa lumba para sa prestihiyosong Golden Boot award.
Ikatulong sunod-sunod nga higayon na kini nga nakaabot ang France sa World Cup semifinals.
Tinguha sa 2018 world champions nga mabawi ang maong titulo human sila natapos isip runner-up batok sa Argentina niadtong 2022.
Bisan pa man napildi ang Morocco, nagpabilin gihapong impresibo ang ilang kampanya.
Kana gumikan kay sila ang nasod sa Africa nga nakasulod sa semifinals niadtong 2022, ug nagpakita gihapon sa ilang kalig-on karong tuiga human makasulod sa quarterfinals.
