CEBU – Gipasalig sa Department of Education sa Central Visayas (DepEd 7), nga dili nila pasagdan ang mga tinun-an nga malambigit sa bisan unsang insidente nga may kalambigitan sa gang subay sa pamahayag sa Cebu City Police Office (CCPO) nga posibleng mibalik ang mga batan-on sa mga tunghaan karong bag-o.
Matud pa ni DepEd 7 Director Salustiano Jimenez, nga wala silay nadawat nga taho sa mga insidente nga may kalambigitan sa gang sa publiko ug pribadong elementarya ug high school sukad sa duha ka managlahing insidente nga naglambigit sa mga menor de edad.
Usa sa mga insidente mao ang pagdunggab sa usa ka tinun-an sa Mabolo National High School, kung diin pauli na unta ang estudyante niadtong Septiyembre 14 sa gabii dihang gidunggab.
Laing estudyante ang gikulata sa grupo sa mga batan-on sulod sa Regino Mercado Memorial National High School sa Barangay Pahina-Central niadtong Septiyembre 16.
Kini nga mga insidente nakapukaw sa mga pagduda nga ang away tali sa mga miyembro sa mga gang nga nakabase sa eskuylahan nga Bloods ug Crips nabanhaw.
Hinungdan nga si Jimenez mimando sa tanang school personnel sa DepEd , partikular na sa mga pampublikong tunghaan, nga dili tugotan ang bisan unsang away o kagubot sa mga estudyante ug sulbaron dayon kini.
