CEBU CITY-Mipasalig ang Department of Education (DepEd) Cebu City Schools Division ngadto sa Cebu City Government nga ang tanang ekipo nga napalit alang sa Palarong Pambansa 2024 kay itugyan kini arun dili masayang ug magamit kini sa maayo nga butang.
Matud ni DepEd Cebu City Division Assistant Schools Division Superintendent Adolf Aguilar nga kini nga pamaagi mao’y ilang paagi sa pagsuporta sa plano sa City Government nga magtukod og comprehensive sports program.
Matud pa niya nga ang mga telebisyon nga gipalit alang sa Palaro ihatag sa mga tunghaan ilabina sa mga bukirang barangay sa dakbayan.
Iyang gihimo ang maong pamahayag atol sa sidelines sa Palarong Pambansa 2024 Closing Ceremony nga gipahigayon sa Cebu City Sports Center kagahapon sa hapon.
Dugang pa sa opisyal nga kini mao’y lihok sa DepEd sa pagsuporta sa mga inisyatiba sa Siyudad, ilabi na sa pagpalambo sa mas daghang Sugbuanong mga atleta sa umaabot.
Nagpasalamat usab siya sa Siyudad sa pagsuporta niini sa Palarong Pambansa 2024 nga gipahigayon gikan sa Hulyo 9 hangtod sa Hulyo 16.
