Cebu City- Patay ang Deputy Chief Of Police sa Guihulngan Police station human kini gipusil sa riding in tandem suspek samtang nangape sa Guihulngan City Negros Oriental.
Ang biktima mao si Police Sr. Inspector Porferio Gabuya. Sa interview sa Bombo Radyo ni Police Sr Supt Raul Tacaca, direktor sa Negros Oriental Police Provincial Office, gibutyag niini nga bag-uhay lang nga nahuman sa pagpahigayon ug checkpoint sa Brgy Poblacion sa maong syudad ang grupo sa biktima.
Nihapit lamang aron nga mangape ang biktima sa usa ka tindahan sa dihang kalit nga miabot ang mga suspek sakay sa itom nga motorsiklo nga walay plate number ug dayon pusil sa biktima.
Matud pa ni Tacaca nga nakataptap sa ilang nawong ang mga suspek ug nakasuot usab ug shades.
Nadala pa sa tambalanan ang biktima apan gideklarar kini nga dead on arrival.
