PROVINCE OF CEBU- Pagasusihon sa Department of the Interior and Local Government (DILG) sa Cebu ang gitukod nga public comfort room o CR sa Barangay Tajao, lungsod sa Pinamungajan, nga nagkantidad og P1.153 milyon, human kini makadani og kasamok sa katawhan tungod sa giingong dako nga gasto.
Ang pondo gikan sa Seal of Good Local Governance (SGLG) Incentive Fund, ug base sa mayor’s office, gisunod nila ang tanang legal ug administratibong proseso sa pagtukod sa proyekto.
Apan nagpahayag og kabalaka si Cebu Governor Pamela Baricuatro, ug iyang gisugo ang pagpatuman sa independent audit aron masuta kung asa gyud naadto ang maong pondo.
Gihangyo usab sa gobernador ang munisipyo nga ipakita ug ipatik ang detalyadong rekord sa gasto ug bidding process aron mapakita ang tinuod nga transparency.
Subay niini, gipahibalo ni DILG Cebu Provincial Director Dr. Jesus Robel T. Sastrillo Jr., nga ang ilang team uban sa mga engineer gikan sa regional ug provincial offices magpadayon sa inspection karong October 28, aron masuta mismo sa site ang proyekto ug matubag ang mga pangutana sa publiko.
Sa pikas bahin, si Mayor Glenn Baricuatro midipensa sa proyekto ug mipamatuod nga gisunod nila ang tanang balaodnon nga proseso ug giaprobahan kini sa DILG.
