CEBU CITY — Andam ang Department of Interior and Local Government (DILG) nga makigkita ni Cebu Governor Gwendolyn Garcia sa korte kung padayon kining mokwestyon sa integridad sa ahensya.
Kini ang nahimong pamahayag ni DILG Undersecretary RJ Echeverri atol sa pagbisita niini sa Sugbo taliwa sa isyu sa pagpatuman sa road clearing operations.
Una niini, wala nakapasar ang pito ka mga local government units sa Sugbo sa assesment sa DILG mahitungod sa paghawan sa mga nagbabag sa kadalanan.
Kini ang nahimong hinungdan nga, matud pa, wala nalipay si Garcia sa rating system ug performance sa ahensya alang sa pagtuman sa kamanduan ni Presidente Rodrigo Duterte.
Matud ni Echeverri nga dili lang ang ahensya maoy giinsultuhan sa gobernadora, kun dili ang mismong presidente sa nasud nga maoy nagmando sa paghawan sa mga nagbabag sa dalan.
Mipahinumdom ang undersecretary nga andam nga motabang ang DILG sa gobernadora ug dili sa pagsaway kaniya.
Kahinumduman nga napakyas ang mga LGUs sa probinsya sa Sugbo sa pagpatuman sa road clearing operations sama lang sa Carcar City, Badian, Carmen, Compostela, Ginatilan, Moalboal, ug Pinamungajan.
