Giklaro ni Interior Secretary Jonvic Remulla ang iyang miaging pamahayag bahin sa pag-ronda sa mga balay sa mga rehistradong tag-iya og armas sa nasud.
Sumala sa kalihim, dili na kinahanglan og search warrant kung ang tag-iya sa armas boluntaryong mosugot nga susihon sa mga pulis ang lugar diin gitipigan ang ilang armas.
Dugang pa niya, kinahanglan nga mopirma ang mga tag-iya og armas og waiver nga nagpasabot sa ilang pag-uyon nga tugotan ang mga awtoridad sa pag-inspeksyon sa lugar nga gitaguan sa armas.
Matod ni Remulla, ang maong lakang gitumong sa pagsiguro nga luwas ang lugar diin gitipigan ang mga armas ug dili kini dali ma-access sa mga menor de edad.
Kahinumdoman nga adunay mga insidente sa pagpamusil sa mga eskwelahan diin ang mga menor de edad nakakuha og armas nga gipanag-iya sa ilang mga ginikanan o paryente, nga misangpot sa mga insidente sa pagpamusil.
