Nipasalig ang Department of Health (DOH) niadtong Sabado nga ang serbisyong medikal magpabilin nga walay hunong sa mga evacuation center ug apektadong komunidad sa Luzon ug Visayas human sa pagkusokuso sa Bagyong Opong.
Nagkanayon ang DOH nga libreng konsultasyon ug tambal ang gihatag sa 230 ka evacuation centers sa Eastern Samar ug 127 sa Metro Manila.
Subay kini sa pagpaningkamot sa pagtubag sa panglawas human sa bagyo, samtang, gipatuman usab sa Masbate, usa sa labing grabe nga naigo nga mga probinsya human ang Opong mi-landfall niadtong Biyernes. Diin, ang probinsya ubos sa state of calamity, sumala ni Gobernador Richard Kho.
Sa pagkakaron, adunay 15 ka mga doktor sa mga baryo (komunidad) ug 59 ka mga nurses nga gipakatap sa Masbate aron madugangan ang mga health worker sa local government unit.
Samtang, gikataho usab nga adunay kapin sa 6,700 ka pamilya sa Calabarzon Region ang anam-anam na karon nga namauli sa ilang mga panimalay.
Base sa pinakabag-o nga datos gikan sa National Disaster Risk Reduction and Management Council, kapin sa 23,300 ka pamilya ang naserbisyuhan sulod sa 1,482 ka evacuation centers sa tibuok nasod sukad ni-landfall ang Tropical Depression Mirasol sa Aurora sa niaging semana ug giguba sa Opong ang nagkadaiyang bahin sa Visayas niadtong Biyernes.
