Mohimo og legal nga aksyon ang Department of Justice batok sa mga indibidwal nga mao’y nagpaluyo sa pagpakatap sa peke nga video ni Presidente Ferdinand Marcos Jr. nga giingong naggamit og ilegal nga drugas.
Matod ni Justice spokesperson Mico Clavano nga ilegal ang paghimo ug pagsabwag sa maong video ubos sa Article 154 sa Revised Penal Code, nga nagsilot sa supak sa balaod nga pagmantala sa mga materyales nga posibleng mapriso og 1 ka bulan ug usa ka adlaw ngadto sa 6 ka bulan.
Dugang pa ni Clavano nga ang pagpagawas sa maong peke nga video sa mismong adlaw sa SONA sa Presidente nagpadayag sa tuyo nga gub-on ang kredibilidad sa Presidente ug importanteng taho ngadto sa katawhan.
Kining malisyosong binuhatan nagdaot usab sa pagsalig sa publiko ug ang pagkaylap sa bakak nga impormasyon naghulga sa kahusay.
Kalabot niini, si Clavano niingon nga ang DOJ komitado sa pagpatuman sa balaod ug mohimo sa tanang tukmang aksyon aron mailhan ug mapasakaan og kaso ang mga responsable sa ilegal nga kalihokan.
