CEBU CITY – Mihimo na usab og kasaysayan si Donnie ‘Ahas’ Nietes human niini gipildi si Komgrich Nantapech sa Thailang arun nga malangkat ang IBF world flyweight title ug lakip ang three division world champion sa main event sa Pinoy Pride 40: Domination nga gipahigayon dinhi sa dakbayan sa Sugbo.
Human sa 12 rounds, usa ka unanimous decision win ang natala ni Nietes sa score nga 115-113, 117-111, 117-111.
Sa sugod pa lang hangtud na sa 12 rounds hilabihan ang pressure ni Nantapech kang Nietes apan kanunay nga lugi sa kumo ang Thailander.
Bilib usab ang kampo ni Nietes sa gipakita nga kalig-on sa kaatbang hinungdan nga dali silang mihatag og patimbaya sa kampo ni Nantapech human sa binakbakay.
Gipabuhagay usab ni Nietes ang iyahang kalipay nga nalangkat niya ang maong titulo.
Gibutyag ni Nietes sa dihang nahinabi sa Bombo Radyo Cebu nga dili siya makatuo nga ka lebel na niya karun sila si Nonito Donaire ug Manny Pacquiao nga nagkampeon sa tulo ka dibisyon ug labaw pa.
Matud usab niini nga plano unta sa ilahang kampo nga i-knockout si Komgrich Nantapech apan gi-usab nila ang ilahang plano sa dihang nakita nila nga kaya sa Thailander ang iyahang mga kumo hayan gipaagi na lang nila sa puntos ang kadaugan.
Gipadayag usab ni Nietes nga human ang nahisgutang kadaugan giingong gusto niini og unification fight batok sa uban pang kampeon sa flyweight division.
Samtang sa undercards usab, gikinahanglan lang og 2:05 sa unang round sa pinoy boxer ug KO artist nga si Mark ‘Magnifico’ Magsayo arun nga pildihon si Issa Nampepeche sa Tanzania arun nga itala ang 1st round TKO sa ilahang schedules 10-round featherweight fight.
Usa ka solido nga counter left hook sa nawong ang nagpatumba kang Nampepeche.
Nakabangon pa unta ang Tanzanian boxer apan natumba kini pagbalik sa dihang gikaligo ni Magsayo og power punches hinungdan nga gihunong na lang sa referee nga si Tony Pesons ang duwa.
Unanimous decision usab ang nalangkat sa usa pa ka pinoy boxer nga si Jeo ‘ Santino’ Santisima diin gipildi niini si Master Suro sa Indonesia.
Gipatumba niini ang Indonesian boxer pagtaak sa 6th round.
Paghuman sa ilahang scheduled 10-rounds nga away, mihatag ang tulo ka judges og 100-89 pabor kang Santisima.
