Gikatakdang mopasaka og mga kasong kriminal ang Department of Public Works and Highways (DPWH) batok sa mga giisip nga ‘big fish’ o mga dagkong personalidad nga nalambigit sa kontrobersiyal nga eskandalo sa mga flood control projects sa nasod.
Gihimo ni DPWH Secretary Vince Dizon ang maong dinalian nga pahibalo karong adlawa, Miyerkules, Hunyo 3, atol sa iyang gipahigayon nga inspeksyon sa Matalahib Creek Pumping Station didto sa Quezon City.
Bisan pa man kon nagdumili una ang kalihim sa pagbutyag sa mga ngalan sa mga respondents, gikompirma niini nga gilangkuban ang maong listahan sa mga high-profile ug impluwensyadong mga indibidwal gikan sa probinsya sa Bulacan.
Matud ni Dizon, pormal nga isangat ang maong mga kaso ugma, Huwebes, Hunyo 4, didto sa Malolos Regional Trial Court (RTC).
Kahinumduman nga una nang giaprubahan sa Office of the Ombudsman ang pagpasaka og mga kasong kriminal, lakip na ang plunder, batok sa pipila ka mga prominenteng magbabalaod sama ni Senador Jinggoy Estrada ug mga kanhi opisyal sa DPWH.
Gawas niini, una na usab nga mikiha ang DPWH batok sa ubang mga district engineers ug pribadong kontraktor human madiskubrihan ang mga anomaliya sa mga proyekto nga mikalas og gatusan ka milyon ka pesos didto sa Bulacan ug sa nagkalain-laing probinsya sa nasod.
