DALAGUETE, CEBU-Nabulabog ang usa ka gituohang drug den sa Barangay Caleriohan, lungsod sa Dalaguete sa habagatang Sugboo sa gipahigayong buy-bust operation sa mga sakop sa Philippine Drug Enforcement Agency Cebu Provincial Office (PDEA-7) ug Dalaguete Municipal Police Station niadtong Enero 24, 2025.
Giila ang mga dinakpan nga sila alyas Juanito, 53-anyos ug usa ka habal-habal driver kinsa maoy subject sa maong operasyon ug si alyas Angelo, 33-anyos, usa ka mag-uuma, nga nasutang maong maintainer sa drugden nga pulos lumulupyo sa naasoy nga barangay.
Laing nasikop sab ang usa ka alyas Margarita, 39-anyos ug usa ka manindahay og pagkaon og tigpadagan sab sa maong drug den nga lumulupyo sa Barangay Jolomaynon sa samang lungsod.
Nakuha kini atol sa operasyon sa 14 ka pakete sa gituohang shabu nga nagtimbang sa kapin 51 ka gramos nga adunay balor nga 346,000, buy-bust money nga mubalor P648 ug mga nagkadaiyang drug paraphernalia.
Gisumiter na ang mga ebidensya ngadto sa PDEA 7 Regional Office Laboratory para sa chemical analysis ug tukang disposisyon niini.
Kasong kalapasan sa Republic Act No. 9165 ang atubangon sa mga suspek diin giandam na kini sa mga operatiba sa PDEA ug sakop sa kapulisan.
