Mibutyag si Regional Director Shalaine Lucero, nga nakadistribute na ang buhatan sa Department of Social Welfare and Development – Central Visayas (DSWD-7) ug kapin sa 217,000 ka family food packs.
Matud ni Lucero, nga dili sayun ang pagdistribute sa mga hinabang ngadto sa 12 ka mga munisipalidad nga adunay grabeng naapektuhan sa linog, hinungdan nga gitahasan ang mga local government unit nga maoy mo unay ug hatud ngadto sa mga hilit nga lugar matag barangay.
Dugang usab niini, nga mahuman na unta og pagdistribute ang buhatan apan gumikan sa kahout sa trapiko sa nakalabayng adlaw, hinungdan nga nadelatar ang mga hinabang.
Magtagbo usab karong adlawa ang mga nagkadaiyang liderato sa mga local government units kauban ni DSWD Sec. Rex Gatchalian, aron sutaon ang sitwasyon ug susihon ang mga panginahanglanon sa matag munisipalidad.
Giawhag usab sa DSWD nga kinahanglan gayud nga adunay datos nga mahatag ang LGUs sa pagpanghatag ug hinabang aron masayran usab kung pila ug si kinsa ang mga nagkinahanglan.
Gipasabut usab sa Regional Director, nga dili gayud malikayan nga mangayu og datos ang buhatan gumikan kay parti kini sa proseso ug labaw sa tanan manubag ang buhatan sa mga serbisyo nga ilang gitunol ngadto sa katawhan.
Samtang sa pikas bahin, nakasabot si Lucero sa mga ni boluntaryo ug nangunay sa paghatud og hinabang ngadto sa mga biktima, apan gihimug-atan niini nga kinahanglang organisado ug adunay sistema ang paghatud niini gumikan kay possible usab nga dili maapod-apud ang mga hinabang hinungdan nga adunay lugar nga buhong niini ug aduna poy wala maabti niini.
