Gipasalig ni Department of Social Welfare and Development Secretary Rex Gatchalian nga adunay igong family food packs ang ahensya alang sa mga pamilyang apektado sa pagbuto sa Kanlaon Volcano sa Negros Island.
Gawas sa 10,000 ka family food packs alang sa Negros Occidental ug Negros Oriental, dugang 10,000 ka FFPs ang miabot gahapong adlawa gikan sa DSWD packaging center sa Sugbo.
Dugang pa sa kalihim, nagpaabot ug dugang tabang gikan sa Bacolod area alang sa kinatibuk-ang target nga 50,000 ka FFPs.
Subay sa mando ni Presidente Ferdinand R. Marcos Jr., kinahanglang sigurohon sa buhatan sa DSWD nga walay bisan usa sa mga pamilya nga biktima sa pagbuto sa bulkan ang magutman.
Ang kadagkoan sa DSWD nipasalig sa hugot nga koordinasyon sa ahensya sa mga apektadong local government units aron personal nga mahibaw-an ang mga sitwasyon sa ilang tagsa-tagsa ka lokalidad.
Gawas sa family food packs, andam usab ang DSWD nga muhatag og uban pang matang sa hinabang sa mga apektadong pamilya.
Sa pikas bahin, andam usab ang Philippine Red Cross (PRC) nga mohatag og tabang sa mga residente nga nabakwit tungod sa pagbuto sa Kanlaon Volcano.
Matod ni PRC Chairman Richard Gordon, naka-standby ang mga water tanker, food truck, ug uban pang kagamitan alang sa mga apektadong residente.
Diin gibanabana nga moabot sa 8,000 ka mga tawo ang mahimong maapektuhan sa pagbuto sa bulkan ug sa pagkakaron nagpadayon sa pagmonitor sa sitwasyon ang PRC ug andam nga magpadala og dugang tabang kung gikinahanglan.
