Gihimo ni Department of Social Welfare and Development (DSWD) Secretary Rex Gatchalian ang usa ka walk-tour sa Visayas Disaster Resource Center (VDRC) nga anaa nahimutang sa Barangay Tingub, Mandaue City, Cebu atol sa iyahang pagbisita, aron personal nga susihon ang kahimtang sa padayon nga relief operations sa DSWD Field Office-VII.
Sa maong inspeksyon, gisusi ni Secretary Gatchalian ang kahimtang sa mga relief goods ug ang operasyon sa pag-repack sa food packs nga ipang-apod-apod sa mga apektadong lugar sa rehiyon human niigo ang 6.9 magnitude nga linog niadtong Setyembre 30, ug kini matod niya ubos sa mando ni Presidente Ferdinand Marcos Jr.
Sa susamang adlaw, nagpahigayon usab og close door meeting si Sec. Gatchalian inubanan ni Shalaine Marie Sun – Lucero, ang Assistant Regional Director for Operations, sa DSWD Field Office-7
aron sa pagsuta sa kasamtangang sitwasyon, ingun man kung pila na kabuok ang mga indibidwal ang nagpabiling nanginahanglan og hinabang.
Subay sa datos sa DSWD-7, adunay kapin na sa 216,000 food packs ang nahatag ngadto sa mga apektadong komunidad, ilabina sa Amihanang bahin sa Sugbo nga usa sa mga labing napektuhan sa nasangpit nga kalamidad.
Gani, nahuman na ang maong buhatan sa ilang wave-1 sa pagpang apod-apod sa mga hinabang nagdto sa mga biktima sa kalamidad, ug sa kasamtangan, wave-2 na kini nga sesyon nila ug nagsubay gihapon sa pagsiguro nga mas daghan kini kompara sa wave-1, ingun man nagtumong nga ma-accommodate ang mga angayang hatagan sa hinabang.
Gitataw usab ni Sec. Gatchalian nga ilaha usab nga tagaan og financial nga tabang ang mga indidbiwal nga adunay nakalas nga kinabuhi sa miyembro sa ilang pamilya nunot sa linog.
Samtang, ugmang adlawa, gikatakda usab ang ilahang panagpulong nga gilangkuban sa tanang local executives ug usab si Cebu Governor Pamela “Pam’ Baricuatro aron magsusi-susi ilabi na sa hisgutanan kabahin sa “transport of relief goods” nga nakasinati og hinay ngadto na sa bug-at nga dagan sa trapiko a ingun sa Amihanang bahin sa Sugbo.
