CEBU PROVINCE-Duha ang patay ug unom ang naangol human mibangga sa usa ka pedestrian ug dayong igo sa punoan sa caimito sa usa ka passsenger van kaganihang alas 8:30 sa buntag, sa Brgy. Guibuangan, Barili, Cebu.
Gikompirmar sa Barili Police Station ang kamatayon sa duha ka mga indibidwal sa maong aksidente.
Patay on the spot ang katorse anyos nga si Irish Omagac nga molupyo sa maong barangay. Samtang dead on arrival ang usa sa mga pasahero sa van nga si Lilibeth Devaras, singkwenta’y otso anyos, nga taga Valencia, Bukidnon.
Sa inisyal nga imbestigasyon nga gihimo sa mirespondeng sakop sa PNP nga silang PMSg Gilbert Encabo ug PSSg John Robert Sacan (traffic investigator) nasayran nga nagsubay sa National Highway sa Brgy Guibuangan, Barili gikan sa Dakbayan sa Sugbo ang maong van.
Sa pag-abot sa lugar sa nahitaboan sa aksidente, gikataho nga ang van drayber kusog nga mipadagan sa van ug nilusot sa pikas lane pagpangandam sa pag-overtake sa laing sakyanan sa iyang atubangan apan miigo hinuon kini sa biktima nga naglakaw sa pedestrian daplin sa dalan.
Tungod sa kakusog sa pagkabangga, nalagpot ang biktima sa yuta hinungdan sa iyang hinanaling kamatayon.
Ug tungod wala na makontrolar sa drayber niini ang iyang gimaneho nga sakyanan miresulta nasab kini sa pagkabangga sa punoan sa caimito nga nahimutang daplin sa karsada.
Miresulta kini sa kamatayon sa usa sa mga pasahero nga si Lilibeth Devaras samtang kritikal ang kondisyon sa driver sa van nga si Francis Pagatpat.
Samtang ang laing unom ka pasahero daling nadala sab sa tambalanan.
