Mainitong gihangop sa Kagamhanang Lalawigan sa Sugbo ang anaa sa 13 ka dugang nga mga medical doctors ug dul-an 200 ka mga nurses nga ipakatap sa mga nagkadaiyang provincial ug district hospitals sa probinsya.
Personal nga gi-abi-abi ni Cebu Provincial Governor Pamela “Pam” Baricuatro ang mga medical professionals sa Cebu Capitol Social Hall kagahapong adlawa sa Martes, Agosto 26, 2025.
Gani kauban ni Provincial Health Consultant Dr. Nikki Catalan ang pagpahigayon sa onboarding for deployment sa mga dugang personahe nga idestino sa mga tambalanan nga gidumala sa Kapitolyo sa Sugbo isip pagpanumbalik sa kapabilidad nga makadalit og dekalidad nga serbisyong medikal sa daghang dapit sa lalawigan.
Kabahin kini sa gipasalig nga pagpalambo sa natad sa panglawas ni Gov. Baricuatro ang pagpadugang sa mga personahe sa mga tambalanan nga makasugakod og serbisyo og dili na maghuot sa pipila ka mga ospital sa dakbayan sa Sugbo.
