Mokabat sa dul-an 3000 ka mga kapulisan ang ipakatap sa Cebu Police Provincial Office (CPPO) alang sa umaabot nga piniliay aron masiguro nga luwas, insakto, patas ug walay motumaw nga election related violence sa kinatibuk-ang probinsya sa Sugbo.
Mao kini ang gipaambit ni CPPO provincial director PCol. Jovito Anatacio atol sa gilusad nga peace covenant sa integrity pledge signing sa CPPO Headquarters diin gitambongan sa mga nikandidato gikan sa nagkadaiyang distrito ingon man sa Vice Governor ug Gubernatorial candidates sa probinsya ug wala ang presensya ni Governor Gwendolyn Garcia.
Gipasalamatan ni PCol. Anatacio ang mga nitambong nga mga kandidato kay nagpakita lang kini nga gusto usab nilang mamahimong hapsay ug malinawon ang umaabot nga eleksyon.
Mapasalamaton usab ang direktor sa mga hingtungdang ahensiya nga mamahimo nilang katambabayong sama sa AFP, COMELEC ug mga election watchdog groups.
Subay niini, giawhag sa opisyal ang mga magpapili nga tahuron ang tinud-anay nga esensya sa demokrasya pinaagi sa pagsunod sa mga lagda sa piniliay ug pagkamaayo nga ehemplo sa publiko.
