CEBU CITY-Dul-an 100 million pesos ang kinatibuk-ang balor sa shabu nga nasakmit sa Police Regional Office (PRO-7) sulod lang sa usa ka buwan–gikan Agosto 1 hangtud Agosto 29.
Gilangkuban sa mga shabu, nubain, ug marijuana ang mga nasakmit gikan sa kapin 700 ka mga operasyon nga mitimbang og 12.5 kilos ug dunay DDB Value nga 97,662,708.16.
Nag-una sa ihap ang Cebu City Police Office (CCPO) kung diin muabot sa 60,116,932 pesos ang nakuha sagol na kini sa marijuana, Nubain, ug shabu.
Gisundan kini sa Mandaue City Police Office (MCPO) nga nakasakmit og 15,268,732 pesos. Ikatulo usab ang Cebu Provincial Police Office (CPPO) nga dunay 12,545,417 pesos nga balor sa shabu.
Samtang 6,523,104, pesos ang nakuha sa Negros Oriental Provincial Police Office (NOPPO). Ang Lapu-lapu City Police Office (LLCPO) nakasakmit usab og 1,720,679 pesos. Samtang ang Siquijor Provincial Police Office (SPPO) ang nakakuha lamang og 748 pesos worth of shabu.
Sa pakighinabi sa Bombo Radyo Cebu kang PCol. Gemma Vinluan, ang city director ng CCPO giingon niini nga tungod matud pa kini sa kakugihan sa mga kapulisan sa Sugbo ug igo lamang siya mi-supervised niini. Napamatud-an na matud pa niya ang dedikasyon sa iyang mga sakop.
Mas palig-onon ug hingusgan pa usab nila ang ilang mga operasyon. Kung dako na matud pa para sa uban ang 60 milyones pesos nga shabu, nagkanayon si Vinluan nga dili pa kini mao.
Gani boot pa niini nga makigpartner sa Bureau of Customs apan kuwang pa sa karon matud pa sa teknolohiya ang dakbayan. Hayan gi-awhag ni Vinluan ang publiko–ang tanang Sugbu-anon nga mukooperar kanila para sa kampanya batok droga.
Mas daghan matud pa og mahimo ang kapulisan kung makig-alayon usab ang matag komunidad.
Nasayran nga duna matud pay barangay nga wala misanong sa panawagan sa city director.
