Nasakmit sa kapulisan sa Mandaue City Police Office (MCPO), ang dul-an 5.2 milyones ka pesos nga balor sa gituohang smuggled cigarettes, sa usa ka panimalay sa Looc, Mandaue City.
Gawas sa mga gituohang smuggle nga sigarilyo, sikop usab ang suspek nga giingong nagdumala niini o caretaker nga si alyas “Hamed” 52 anyos, minyo, ug taga Zamboanga City, apan kasamtangang nagpuyo sa Brgy. Looc, syudad sa Mandaue.
Samtang sa maong operasyon, gipangulohan kini sa Mandaue City Police Unit, inubanan sa Bureau of Customs-7, Enforcement and Security Service sa BOC, CIDG-7, Regional Intelligence Division-7 (RID-7), ug sa NBI, nga nagmalampuson gayud nga nakuha ang kapin 2,000 ka mga rim ka assorted smuggles cigarettes nga naglangkob sa mga brands nga Alfa, King Bravo, ug uban pang inilang mga brands nga gikatahong gikan pa sa nasud nga Indonesia.
Samtang sa nahimong ekslusibong pamahayag usab sa suspetsado nga si Alyas Hamed sa Bombo Radyo Cebu Newsteam, iyang gilimod nga siya ang nanag-iya sa mga gituohang smuggled nga sigarilyo.
Ingun man nga nagdumili siya sa pagbutyag kung kinsa ang tinuod nga personahe nga nagpaluyo sa pagpalusot sa susamang mga produkto.
