Dili manumbaling ang Mayor sa Dumanjug, Cebu sa mga proyekto sa imprastraktura gumikan ang iyang gitinguha karon nga ang iyang mga tinun-an kay mga intelihente, maayo morespetar ug maayo og kinaiya.
Atol sa pakighinabi sa Bombo Radyo Cebu Newsteam kang Mayor Efren Guntrano “Gungun” Gica, iyang gipaambit nga siya mismo ang nangunay sa paghimo og ordinansa sa hingpit nga pagdili sa mga cellular phone sulod sa eskwelahan nga epektibo gahapong adlawa.
Kini ubos sa gipalig-on nga mga lakang sa kaluwasan sa mga tunghaan nunot sa nahitabong pagpamusil sa Tacloban City nga ang mga suspek kay menor de edad.
Ingon man nga gawas sa maong hinungdan, nasayran sa opisyal nga ulahi ang mga bata sa ilang pag-tuon busa niadtong last summer nigahin ang kagamhanan og dul-an P6 milyones alang sa pag-tutor sa mga bata gumikan ‘alarming’ na kini sa ilang probinsiya.
Gihimug-atan usab ni Mayor Gica nga dili niya mamahimong piyungan ang maong sitwasyon tungod kay alang kaniya mas mahinungdanon ang edukasyon kon itandi sa bisan unsang butang.
