Gipahibalo ni Executive Secretary Lucas Bersamin nga ang gobyerno sa Pilipinas dili awtomatikong mosurender kang Senador Ronald “Bato” Dela Rosa ngadto sa International Criminal Court (ICC) bisan pa kon adunay warrant of arrest nga gi-isyu batok kaniya.
Gihimo sa Executive Secretary ang pamahayag human gipangayoan sa iyang reaksyon sa gibutyag ni Ombudsman Jesus Crispin “Boying” Remulla nga ang ICC nag-isyu na og warrant of arrest batok sa Senador kalabot sa pekeng war on drugs sa miaging administrasyong Duterte diin siya nagsilbi nga hepe sa nasudnong kapulisan nga nagpatuman sa nahisgutang kampanya batok sa ilegal nga droga.
Sumala ni ES Bersamin, posible nga ang internasyonal nga tribunal nag-isyu na og warrant of arrest batok sa magbabalaod apan matod niya kinahanglan pa kini nga ipadala pinaagi sa International Criminal Police Organization (Interpol).
Dugang nga gipasabot sa opisyal sa Malacañang nga ang proseso sa pag-aresto sa Senador dili susama sa nahitabo kang kanhi Presidente Rodrigo Duterte kon balido ang warrant of arrest.
Kini tungod kay ang Korte Suprema nag-isyu og bag-ong lagda sa extradition nga nagmando nga ang usa ka kaso kinahanglan paminawon sa korte sa Pilipinas sa dili pa madala sa gawas sa nasud ang usa ka indibidwal nga gipailalom sa extradition.
Samtang, nanawagan ang mga pamilya sa mga biktima sa kampanya batok sa droga nga dakpon si Senador dela Rosa kon ang ICC mopagawas og warrant of arrest batok kaniya.
Sumala sa grupo nga Rise Up for Life and for Rights, dugay na nilang gipaabot ang adlaw nga ang mga kakunsabo ni kanhi Presidente Rodrigo Duterte mabilanggo sa ICC.
Giangkon sa grupo nga gipalapdan ni Dela Rosa ang modelo sa “Davao Death Squad” ngadto sa nasudnong lebel sa dihang nahimo siyang hepe sa Philippine National Police.
