Nagmartsa ang mga vendor ug mga miyembro sa civic group paingon sa Cebu City Hall niadtong Martes sa buntag, Marso 17. Tumong niini ang pagbantay sa gihimong executive session sa City Council aron ribyuhon ang Joint Venture Agreement (JVA) tali sa gobyerno sa siyudad, Cebu2World Development Inc., ug mga asosasyon sa mga vendor.
Subay niini, giasoy ni Winefredo Miro, ang Presidente sa Carbon-hanong Alyansa, nga naka-schedule na ang review sa maong kasabotan sa Carbon Public Market. Hinungdan nga nagkahiusa ang tanang vendors sa panagtapok sa Carbon, diin nalakip ang mga drayber sa traysikad, e-bike, mga kargador, ug uban pa.
Atol sa maong session, nisugyot si Cebu City Councilor Sisinio “Bebs” Andales nga ipa-live streaming ang diskusyon aron makasaksi ang katawhan nga nanagtapok sa Plaza Sugbo ug sa Social Hall.
Mao kini ang gikabutyag ni Miro sa eksklusibong pakighinabi sa Bombo Radyo Cebu newsteam kaniya, aron pagsuta kung unsa ang nahimong dagan sa Executive Session gahapong adlawa. Iyang gidugang nga napakyas ang maong sugyot ni Konsehal Andales, hinungdan nga kadtong anaa lang sa sulod sa session hall ang nakasaksi sa diskusyon.
Dugang ni Miro, atol sa sesyon, ubay-ubay og pangutana ang City Legal ug si Vice Mayor Tomas Osmeña mismo. Bisan ang mga representante gikan sa Megawide gipangutana usab sa mga konsehales sa Dakbayan sa Sugbo.
Hinungdan nga giikalipay kini ni Miro ug sa iyang kauban ang nahitabong deliberasyon gahapon tungod kay daghang legalidad ang natinguhaang maklaro.
Apan alang sa Carbon-hanong Alyansa, gawas sa legal nga aspeto, mas angay usab nga gilantaw ang humanitarian aspect tungod kay apektado ang mga Sugboanong konsumedor ug vendors nga nagsalig sa Carbon Public Market.
Gitataw ni Miro nga sa higayon nga mapribado na ang Carbon ubos sa pagdumala sa Megawide, nagpasabot kini nga sila na ang adunay gahom sa pagkontrol sa tanan.
