Gasto sa US sa giyera sa Iran, niabot na sa $29-B —Pentagon

Subay sa nagpadayong gubat tali sa Estados Unidos ug Iran, gibanabanang niabot na sa $29 bilyon ang gasto nga napagawas sa Estados Unidos, matod sa usa ka senior nga opisyal sa Pentagon niadtong Martes.

Mas taas kini og $4 bilyon kaysa sa miaging bana-bana sa nasud sa miaging bulan nga $25 bilyon lamang.

Apil sa bag-ong numero ang dugang nga pag-ayo ug pag-ilis sa kagamitan, ingon man ang mga gasto sa operasyon sa militar.

Apan, wala dayon giklaro sa Pentagon kung giunsa nakuha ang kinatibuk-ang $29 bilyon.

Kahinomdoman nga na-report usab sa Reuters niadtong Marso nga ang gasto sa Estados Unidos nakaabot na sa labing menos $11.3 bilyon sa unang unom ka adlaw sa gubat, nga gipangulohan ni Presidente Donald Trump sa Estados Unidos.