CEBU CITY-Tinguha sa gatusan ka mga sidewalk vendors nga ma-isturya sa Cebu City Mayor Edgardo Labella kalabut sa gikatakda nga pagpahawa kanila sa kadalanan.
Gibutyag ni Basann Amora, head sa Barangay Sto. Niño Sidewalk Vendor Association, nga tuyu unta nila nga ma-isturya ug personal si Labella arun nga personal usab nila mapadangat ang ilahang hangyu ngadtu sa mayor.
Matud ni Amora nga sa ilahang matag panagpulong kanunay lang nila nga maatubang si Raquel Arce kinsang head sa PROBE hinungdan nga sila nanghinaut nga maatubang usab ang mayor.
Sigon pa nga hangyu-un unta nila si Mayor Labella nga isibug ang clearing operation ug dili basta na lang sila nga papahawa-un.
Gipadayag ni Amora nga nakuha na nila ang tanang requirements ug giingung gamay na kaayu ang ilahang lugar sa sidewalk nga gitindahan ug mas daku na ang agi-anan sa publiko apan nganung padayun gihapun ang pagpapahawa kanila.
Gikabalak-an ni Amora nga maapektuhan ang ilahang panginabuhi-an kansang mao lang ang ilahang gisaligan nga makabuhi sa ilahang tagsa-tagsa ka pamilya.
Nasayran nga karung umaabot nga adlaw nga Miyerkules tinguha sa Cebu City Government ang ‘zero sidewalk vendor’ isip pagtuman sa DILG order nga hawanan ang kadalanan. (SBR)
