Gituki ni House Quad Committee co-chairman ug Manila 6th district Rep. Bienvenido “Benny” Abante Jr. si retiradong police officer ug kanhi PCSO General Manager Royina Garma sa Quad-Committee hearing kalabot sa gisuwat sa kolumnista nga si Ramon Tulfo bahin sa giingong relasyon ni Garma kang kanhi Presidente Rodrigo Duterte.
Basi sa gisuwat ni Tulfo nga gibasa ni Cong. Abante, giingong kinahanglang imbestigahan si Garma kay siya ang nagpaluyo sa pagpatay kang PCSO Board Member Atty. Wesley Barayuga, usa ka retiradong brigadier general nga sakop sa Philippine Military Academy (PMA) Class 1983.
Si Barayuga usa usab ka board member sa PCSO nga nibabag kang Garma sa paghatag og prangkisa sa small town lottery (STL) sa iyang mga higala.
Gikastigo usab sa Quad Comm co-chairman si Garma kung tinuod ba o dili nga adunay news blackout sa pagpatay kang Barayuga kay nasayod ang imbestigador nga adunay relasyon sila si Garma ug kanhi PRRD.
Apan, gihimakak ni Garma ang pasangil nga aduna silay relasyon sa kanhi presidente.
Ingon man ubay-ubay usab nga mga resource person ang nitestigo sa nangaging Quad Comm hearings mahitungod sa kasuod nila ni Garma ug kanhi Presidente Duterte diin ang kanhi usab ang mitudlo kang Garma sa PCSO niadtong tuig 2019.
