Nangayo og permiso ang ‘biggest company’ sa technology nga Google gikan sa Environmental Protection Agency (EPA) aron buhian ang 32 milyon nga laki nga lamok sa California ug Florida sulod sa duha ka tuig isip kabahin sa usa ka bag-ong eksperimento sa panglawas.
Ubos sa proyekto nga “Debug” sa Verily, usa ka subsidiary sa ginikanan nga kompanya sa Google nga Alphabet, diin ang operasyon nagtumong sa pagpakunhod sa populasyon sa southern house mosquito (Culex quinquefasciatus). Kini nga klase sa lamok ang responsable sa St. Louis encephalitis ug West Nile virus, nga nagsakit sa kapin 1,300 ka mga Amerikano matag tuig.
Bisan kung kini nga pamaagi daw katingad-an, ang mga laki nga lamok nga buhian dili mopaak sa mga tawo ug mokaon lamang sa nectar sa bulak. Ang mga lamok gikan sa laboratoryo nataptan sa bacteria nga Wolbachia, nga naghimo kanila nga sterile.
Kung makighilawas sila sa ihalas nga mga babaye nga lamok, ang mga itlog dili mapusa, nga mosangpot sa pagkabuo sa ilang mga espisye.
Sumala sa CDC, ang Wolbachia luwas, dili makatakod sa mga tawo o mga hayop, ug dili makausab sa genetic structure sa mga lamok. Kini nga estratehiya malampuson usab sa Singapore, Thailand, ug Mexico batok sa dengue ug Zika.
