Gibasura sa Sandiganbayan ang kaso sa graft batok ni kanhi Iloilo City Mayor Jed Mabilog tungod sa iyang giingong pagpanghilabot sa paghatag og kontrata sa gobyerno ngadto sa towing services firm.
Sa usa ka resolusyon nga gi-isyu niadtong Agosto 12, giaprobahan sa Sandiganbayan Third Division ang mosyon ni Mabilog nga ibasura ang kaso.
Sumala sa korte, adunay dili makatarunganon nga pagkalangan sa pasiunang imbestigasyon, ug ang Office of the Ombudsman napakyas sa pagpasabot nganong dugay kaayo ang pagpasaka sa kaso.
Si Mabilog ug ang uban giakusahan nga misulod sa usa ka memorandum of agreement uban sa 3L Towing Services. Ubos niini, gitugotan ang kompanya sa pag-clamp ug pagguyod sa mga ilegal nga naka-parking nga mga sakyanan sa Iloilo City nga wala moagi sa usa ka competitive process.
Basi sa mga rekord sa korte, ang reklamo batok kang Mabilog gisang-at niadtong Abril 2015, ug nadawat sa Ombudsman ang iyang counter-affidavit niadtong Agosto sa samang tuig, samtang ang consolidated resolution gi-isyu niadtong Marso 2017.
Niadtong Hunyo 2019, sa katapusan giaprobahan sa Ombudsman ang resolusyon, apan ang kaso wala gisang-at sa Sandiganbayan hangtod sa Marso 2023.
Tungod niini, pito ka tuig, napulo ka bulan ug pito ka adlaw ang milabay gikan sa pagsang-at sa reklamo hangtod sa pagsang-at sa impormasyon sa korte.
Gipasabot sa Ombudsman ang pagkalangan pinaagi sa gilay-on tali sa opisina niini sa Cebu ug sa sentral nga opisina niini, ingon man ang epekto sa COVID-19 pandemic. Bisan pa, sumala sa Sandiganbayan, ang pagpasabot dili igo aron ipasabut ang pagkalangan sa pagsang-at sa kaso mismo.
Gawas sa pagbasura sa kaso, gibawi usab sa korte ang hold departure order batok kang Mabilog ug gimando ang pagpagawas sa iyang bail bond.
Ang desisyon gisulat ni Third Division Chairperson Karl Miranda. Samtang sila si Associate Justices Ronald Moreno ug J. Ermin Miguel wala mouyon ug nag-isyu og dissenting opinion.
