Gilauman nga personal nga motestigo si Leyte Representative Martin Romualdez alang sa iyang kaugalingong depensa sa P7.44-bilyon nga plunder case nga gipasaka batok kaniya.
Matud sa iyang abogado nga si Atty. Ade Fajardo, gusto ni Romualdez nga personal nga madepensahan ang iyang kaugalingon sa korte human gitapos sa Sandiganbayan Third Division ang pre-trial proceedings.
Posible usab nga mopresentar ang depensa og mga security aide, drayber sa iyang kaubang akusado nga si kanhi Ako Bicol Representative Zaldy Co, ug si Orly Guteza, nga gikatahong mibawi sa pipila niya nga naunang pahayag.
Sumala kang Fajardo, sa bag-ong sworn affidavit ni Guteza, iyang giingon nga ang iyang unang testimonya kabahin sa usa ka “setup” o gilaraw nga pag-akusar batok sa mga akusado.
Gibana-bana nga mokabat sa 40 ang posibleng mga saksi sa depensa, apan mahimo pa kining mausab depende sa mga ebidensiya sa kaso.
Nagpabilin nga detinado si Romualdez sa Quezon City Jail Male Dormitory sa Payatas, samtang tulo sa iyang mga kaubang akusado, lakip si Co, ang wala pa madakpi.
