Mahimo ra nga ipahigayon sa usa ka pampublikong ospital sa gobyerno ang kinahanglang pag-monitor ug pag-atiman sa estado sa panglawas ni kanhi House Speaker Martin Romualdez.
Kini ang gipadayag ni Dr. Rosalio Torres atubangan sa Sandiganbayan Third Division, samtang iyang gikumpirma nga walay gihimong operasyon o surgical procedure kang Romualdez sukad kini gi-admit sa Cardinal Santos Medical Center sa San Juan City niadtong Setyembre 7.
Taliwala sa maong pagdungog, gihatagan og dako nga gibug-aton sa mga prosecutor ang kaduda-dudang pagkasumpaki sa pahayag sa mga pribadong doktor.
Gisultihan ni Torres ang korte nga si Dr. Sibayan ang unang mitagad sa kanhi Speaker, apan gisupak kini ni Sibayan pinaagi sa pag-ingon nga si Dr. Sy ang unang niasikaso kaniya.
Tungod sa maong pagsumpaki, gipangutana karon kon nganong dili makapanghilabt ang mga doktor sa kagamhanan aron masusi ug mamatud-an ang tinuod nga kondisyon sa giingong nasakit nga kanhi opisyal.
Sa kasamtangan, magpabilin una si Romualdez sa Cardinal Santos samtang naghulat sa pormal nga desisyon sa korte bahin sa iyang hangyo nga hospital detention, bisan pa man nga gibalhin na sa Sandiganbayan ang opisyal nitang kustodiya ngadto sa Bureau of Jail Management and Penology (BJMP).
Gikatakda ang gipaabot nga arraignment ug pre-trial ni Romualdez karong Setyembre 14 kalabot sa giatubang niya nga kasong plunder ug anomaliya sa mga flood control projects tali sa katuigang 2022 ug 2025.
