CEBU – Gihatagan ug katin-awan sa grupo sa motorcyle riders nga SuperMoto Cebu nga ang gihimong stunt niini sa pampublikong kadalanan niadtong Dominggo nga naka-ani ug daghang pagsaway, mao ang unang higayon nga gibuhat nila kini sa pampublikong lugar.
Matod ni Manuel Yu, usa sa mga miyembro sa maong grupo nga gihimo lamang nila kadto aron makakuha og hulagway nga isumitir ngadto sa ‘intended partner’ ug gihimo kini alas singko sa buntag aron dili makasamok sa dagan sa trapiko.
Gidugang pa niini nga andam kini nga muatubang sa bisan unsa nga silot nga ihatag sa Land Transportation Office gumikan kay tungod sa maong binuhatan, nabutang sa peligro ang kahimtang sa lain pang mga motorista.
Nagkanayon si Yu nga wala na niini gihuwat nga hatagan og show-cause order sa LTO-7 ug boluntaryo kining nipatim-aw sa ahensya aron manubag sa kalapasan.
Samtang gisegundahan usab kini sa lain pang miyembro sa grupo nga si Ryan Tañeno nga ang gibuhat nga pagpatim-aw sa LTO nagpakita sa komunidad nga kung adunay sayop, kinahanglang atubangon.
Segon ni Tañeno nga wala kini masayod nga usa ka kalapasan sa traffic rules ang gihimo nga pagpakita og ‘stunts’ sa pampublikong kadalanan.
Subay niini, nanghinaot si LTO-7 Regional Director Victor Caindec nga magsilbi kini nga pagtulun-an sa publiko nga dili mobuhat sa susama sa gihimo sa maong grupo sanglit delikado kini. Ipakita matod pa niini sa katawhan nga ang mga sayop nga binuhatan angayan gyud nga kurhian
Nasayran nga gitang tangan na og lisensya ang mga miyembro sa maong riders ingun man gi-isyuhan na kini ug Temporary Operator’s Permit (TOP) gumikan sa reckless driving. Gidugang pa ni Caindec nga kinahanglan usab mopaubos og community service ang grupo ug tudlo-an sa insakto nga pagmaneho.llBCA
